قصيده صزتيه المواني لشاعر فهد مساعد

حبيبـي دام انـا أصـلاً حبيبـك وانــت والفني
اجل وشفيك تزعل يـوم افضفـض وانفـض ايامـي؟
انا لولاك.. قلت : "ان الزمن بامـوت مـا انصفنـي"
وانا لولا الزمن مـا كنـت اهوجـس وانـت قدامـي
هي الدنيـا كـذا .. لا جيـت ارتّـب للكـرى جفنـي
تكاثـر غفوتـي حتـى تصيـر ابعـد مـن احلامـي
هي الدنيا كذا .. و ان كان مـا صدّقتنـي .. شفنـي
شف عيوني .. وشف وش لون جلدي يستر عظامـي
شف..أو.. لا.. لا تشوف.. ان كان ودّك صدق تعرفني
تتبّـع سيرتـي .. او سكتّـي .. او جـرّة اقـدامـي
تتّبعـنـي واذا مـرّيـت دمـعـي لا تضاعـفـنـي
تعـدّ بخطوتيـن وشـف طموحـي كيـف مترامـي
هنـا طحـت.. وهنـا حظـي عثر..وهنـاك وقفّنـي
وهنـا مـاردّوا اللـي كنـت اناديـهـم بالآسـامـي
تهجّـى فالموانـي ليـن تـقـرا سالـفـة سفـنـي
تتبّعنـي مـن اول جـرح واتـرك عنـك هنـدامـي
وانا اقول : "ان تشوف اللـي يحـدّك مـا تحلّفنـي..
.. وش اللي حدّني ابقى علـى جـال النهـر ظامـي"
امانـه بـس لا تـزعـل عـلـيّ .. ولا تخالفـنـي
لو ابكيتك مـن همومـي .. او ابكيتـك مـن هيامـي
انـا لولاك..قلـت: "الوقـت هـذا مــا يشرّفـنـي"
ولولا الوقت قلت اني خذيـت اكبـر مـن احلامـي !

لشاعر فهد مساعد

قلب